SOGN OG FJORDANE 4H-ALUMNKLUBB

Sogn og Fjordane 4H-alumnklubb (forkorta SOFA) er fylkesorganisasjonen for dei ungdommane som har fullført 4H-løpet i Sogn og Fjordane, men som framleis har lyst til å vere medlemmer i 4H. Medlemsalderen er hovudsakleg 18-25 år, men det er mogleg å vere med lenger. Størstedelen av aktiviteten til SOFA er tilknytt 4H Sogn og Fjordane. Medlemmene i SOFA er med som instruktørar og nattevakter på kurs, og leiarar på leirar som vert arrangert på fylkesplan og på nasjonalt plan. Fleire av medlemmene i SOFA har utdanning som kursinstruktørar i styrevervkurs og organisasjons- og demokratiopplæring, og andre har vaksenleiarkurs med fokus på førstehjelp og psykososial førstehjelp. I tillegg arrangerer SOFA aktivitetar for dei eldste i 4H-løpet og for alumnar og bidreg der vi kan for 4H i fylket. Av aktivitetar som er gjennomført dei siste åra er det sosiale hytteturar, bowling, gokart mm, i tillegg til at SOFA kvart år har ansvar for den sosiale opphaldsplassen og kiosken under fylkesleiren til 4H Sogn og Fjordane. SOFA har som mål å gjere 4H kjekkast mogleg for dei som er i vanleg medlemsalder, samtidig som vi skal ta vare på dei som held fram i 4H ved endt 4H-løp.