BERGSIDA GRUNNEIGARLAG SA

Laget er ei organisert samanslutning mellom grunneigarar av landbrukseigedom innanfor området omfatta av gardane Vinsrygg (gnr. 47), Nedreberg (gnr. 48), Lunde (gnr. 49), og Øvreberg (gnr. 50), på Bergsida i Stryn kommune. Lagets område omfattar utmarka under desse fire gardane, inklusiv fellesområde. Laget sitt hovudføremål er å samle grunneigarane i området for, i fellesskap, å forvalte utmarksressursane som ein del av landbruksnæringa på ein måte som skapar auka grunnlag for arbeid og inntekt innanfor ramma av langsiktig forvalting. Laget kan representere grunneigarane i saker som vedrører felles interesser i utmarka, herunder m.a. næringsmessig forvalting av ressursane, allmenn- og samfunnsnyttige tiltak, og natur- og frilufts-spørsmål. Laget skal innanfor lagets geografiske område arbeide for: ei langsiktig ressursforvalting, å legge til rette for utnytting av beiteressursane, å legge til rette for og ta særleg omsyn til setring, å forvalte viltet, viltet sitt leveområde og jakt, å forvalte fiske og fiskevatn, samarbeid med offentleg forvalting, samarbeid med andre grunneigarlag, utmarkslag o.l., om felles interesser.